وحشتيني

كوباية مية ساقعة مشبرة فى يوم حر جدا
بطانية تقيلة و ناعمة فى يوم برد جدا
عشرة جنيه منسية فى جيب قميص فى يوم معكش فيه ولا مليم
كبسولة كيتوفان فى يوم يكون عندك فيه صداع مدمر
مناديل كلينكس فى يوم تكون مناخيرك سايبة فيه من البرد
كرسى مريح بعد مشوار طويل من المشى المتواصل
دراع بيمدلك حبل متين وقت غرقك
ابتسامة من القلب يوم فرحك
دمعة مرغرغة فى العيون يوم حزنك
طبطبة على كتفك فى وقت عصبيتك
ودان بتسمعك فى وقت رغيك
ضحكة مجلجلة على نكتة انت قلتها
عرايس بتدخل جوة بعضها كان نفسك فيها من زمان
وتعدى سنين وتلاقيها لسة فاكرة اللى كان نفسك فيه وتفجأك انها جابتهولك
مكالمة تليفون من ابو ظبى الساعة اتناشر بليل يوم خمستاشر يناير
علشان تكون اول واحدة تقولك كل سنة وانت طيب يوم عيد ميلادك
هى دى ملاكى
هى دى ملك
وحشتينى يا ملاكى